Mint verður á, at fyri at ein sak skal kunna avgreiðast á grannastevnu, skal hon vera fráboðað sýslumanninum áðrenn 1. november árið frammanundan.

Tað vil siga, at mál, ið ynskjast viðgjørt á grannastevnu á vári 2027, skulu vera sýslumanninum í hendi áðrenn 1. november 2026.

Vísandi til Lóg nr. 170 frá 18.05.1937 fyri Føroyar um grannastevnu v.m., sum seinast broytt løgtingslóg nr. 209 frá 15. desember 2025.

§ 1.  Á grannastevnu kunnu við atliti til reglur, sum eru í hesi lóg ella eru fyrisettar við aðrari lóggávu, gerast:

1)      viðtøkur um nýtslu av jarðarognum og lunnindum, sum eru feli, og sum tað ikki sambært lóggávuni skal takast  avgerð um á hagastevnu ella á annan serligan hátt um nýtsluna av;

2)      viðtøkur um, hvat ið skal latast til tarvahald í avvarðandi bygd;

3)      viðtøkur um slík viðurskifti, sum annars við lóggávuni eru løgd til avgerðar á grannastevnu (sbr. Hagalógini §§ 25, 1. stykki, síðsta punktum, 30; hegnlógini §§ 2, 39 og 42, punkt 2; lóg um nýtslu av vatni v.m. frá .. §§ 3 og 4; lóg um veiðu, fuglaveiðu v.m. frá 4. apríl 1928 §§ 2 og 5; lóg um týning av yngli hjá ravninum frá 11. mars 1892 § 1). Tær undir punktum 1 og 2 nevndu viðtøkur eru bindandi fyri øll við atkvøðurætti í viðkomandi sak (sbr. § 7). Tær undir punkti 3 umrøddu viðtøkur eru bindandi í tann mun, sum ásett er í teim viðkomandi lógarásetingunum.

Til dømis er talan um útskifting av innan- og uttangarðsjørð 

Seyðamarkingin
Hvør hagi skal hava sítt mark á øllum seyðinum í haganum, ella, um neyðugt, fleiri mark á ymiskum seyðafylgjum í haganum, sbr. § 20, punkt 3b í hagalógini.
Sama mark kann ikki vera hagamark í tveimum høgum í somu oyggj.
Mál, sum viðvíkja markabroytingum, skulu verða viðgjørd á grannastevnu, Sýslumaðurin skal síðan leggja tey fyri avvarðandi ráð, sum umsitur landbúnaðarmál, til avgerðar.
Eingin annar enn røktingarmenn  hagans kunnu av sínum eintingum marka seyð.
Ærseyður, sum ikki hoyrir til hagan, men á fjalli komin upp í gonguna, skal á rættini frámerkjast við sløðuri, tá ið ikki vissa er fyri, at lamb hennara er markað rætt.
Tað er umráðandi, at allur seyður verður væl og týðiliga markaður, so eingin ivi stendst av úr hvørjum haga, seyðurin er.

Kópamerki.
Kópamerki, verður sagt um seyð, sum ómarkaður kemur í rætt. Hevur seyður kópamerki, tá hann kemur á rætt um heystið, varð sagt, at rættin skuldi eiga seyðin. 
Sambært Sprotanum kemur kópamerki av, at kópur hevur ongan oyrnalepa.

Tó skal vísast á, at sambært § 28 í girðingarlógini er ásett:
Tekur ósemja ella ivi seg upp um hvønn haga eitt lamb hoyrir til, sum ómarkað kemur á rætt um heystið, skal tað latast tí haganum, sum tað gongur í.

Seyður, ið er ómarkaður ella so óvandaliga markaður, at sýslumaðurin og tveir óvildarmenn, hann hevur innkallað, vátta merkið at vera ókenniligt, verður viðgjørdur sum funnið fæ, um ivi er um eigaran (sambært § 28 í girðingarlógini).

víst verður annars til ymisku tættirnar á hesi heimasíðu.