Kirkjuvatn í Fámjin

Kirkjuvatn í Fámjin liggur á einum slætta, ið liggur í ein útnyrðing frá býlinginum við Kirkju. Frá býlinginum og upp til vatnið er ein høgur hamari, so vatnið kann ikki ætlast at hava nakað sum helst samband við sjógvin. Gomul søgn er, at tað skal fjara og fløða í Kirkjuvatni. P. C. Johannesen, sum hevur skrivað søguna, sigur víðari frá, at hann hevði tosað um hetta við skilafólk, sum hava ferðast har í haganum, og tey eru øll á einum máli: at tað bæði fjarar og fløðir.
Nú fyri kortum bar hann aftur hetta upp á mál við eitt ungt konufólk, ið hann visti var væl kent har á leið. Hon segði sum øll hini "at har bæði fjarar og fløðir". Hon segði, at millum annað hevði hon eina ferð verið har uppi saman við einari systur og hentað fjarðar, sum riturnar høvdu pilkað av sær. Tá tær komu niðan, vóru so nógvar fjarðar at síggja úti á einum hólmi, men tær sluppu ikki út á hann, tí tær hildu vatnið vera ov djúpt. So gingur tær rundan um vatnið og hentaðu fjarðar, og tá ið tær komu aftur til tað stað, hvar hólmurin lá uttanfyri, tá kundu tær ganga næstan turrskøddar út í hólmin. So kann hvør hugsa um hatta, hvat hann vil.

Kelda: P.C. Johannesen í Varðanum nr. 3

Kirkjuvatn í Fámjin
Kirkjuvatn omanvert Fámjin sæð frá Vallaskarði (mynd: heimabeiti.fo)