Yvirlit yvir tal av ymiskum hvalasløgum, ið hava lagt beinini, ella eru funnin deyð í Føroyum.

Dorete Bloch, sála, ið var deildarleiðari á Føroya Náttúrugripasavninum, gjørdi eitt megnar granskingararbeiði í samband við grindahvalin og onnur hvalasløg, sum antin høvdu lagt beinini, ella eru funnin deyð á Føroyum.

Í samband við nógvu grindamannafundirnar um landið í 1990 unum varð springaramálið nógv umrøtt. Tað var serliga í Hvalba, heima á Sandi og í Miðvági, at spurt varð til, hvussu nógv springarasløg eru til í Føroyum og hvussu stór veiðan hevur verið gjøgnum tíðirnar av hesum sløgunum.

Dorete gjørdi eitt yvirlit yvir tey hvalasløgini, ið hava lagt beinini ella eru funnin deyð í Føroyum.
Í skrivi 13. apríl 1994 til sýslumenninar, sum á hvørjum ári fingu grindahagtølini sendandi, heitti Dorete á sýslumenninar um at siga sær frá, um sýslumenninir høvdu nakrar viðmerkingar til tølini, ið standa í yvirlitinum.
Sýslumenninir í 1994 vóru tá: Karsten Hansen, Norðoyggjar, Sommer Joensen, Suðuroy, Marni av Kák, Vágar, Ivan Klein Olsen, Streymoy, Jógvan Ósá, Sandoy og Kári Thorsteinsson, Eysturoy.

Víðari skrivar Dorete, at oftani hevur verið trupult at greitt frá, hvussu tey ymisku hvalasløgini síggja út. Vísast kann til ta nýggju myndatalvuna "Hvalir í Norðurhøvum", ið Føroya Skúlabókagrunnur og Føroya Nátturgripasavn hava givið út.

Skrivið var framhald av einum skrivi frá 29. mars 1994, tá hon samstundis sendi út grindayvirlitið fyri 1993 til sýslumenninar, fjølmiðlar og onnur.
Doreta nýtti høvi til at takka fyri hjálpsemi frá sýslumonnunum og hansara hjálparfólki við at útvega grindatilfar til yvirlitini. Doreta hevði nú fingið metingina av 85.918 hvalum úr 615 grindum, tilsamans 504.114,625 skinn, so miðalhvalurin er 5,9 skinn. Hetta er umleið ein triðingur av øllum hvalum og grindum.

Føroya Landsstýri og NAMMCO hava nú biðið um at fáa savnað tilfar saman um døgling. Her hevði Doreta longu fingið mestsum alt gamalt tilfar inn á Náttúrugripasavnið, ið tilsamans fevnar um 811 døglingar.

Tilfarið, sum Doreta hevur savnað liggur undir hesi grein.