Grundarsteinurin til Miðvágs kirkju varð lagdur 1. sunnudag eftir trinitatis 1948, og varð hon vígd 28. september 1952.

Ynski um nýggja kirkju var tó eldri enn so, tí tekningin, sum Heini Joensen, byggimeistari, á Ryggi í Miðvági - Bóndaheini - teknaði, og sum kirkjan er bygd eftir, er dagfest í mai 1930.

Sum ungur fór Heini Joensen í timburlæru í Bergen. Samstundis var hann næmingur á "Bergens teknikse Aftenskole". Hugkveikingar frá tátíðar vesturnorskum byggisniði - Jugendstílurin - eru eyðsýndar í nógvum detaljum í Miðvágs kirkju.

Alt snikkaraarbeiði varð smíðað á Miðvágs Maskinsnikkaraverkstaðið - við Gjónna - sum Heini Joensen hevði verið við til at stovnað í 1918.

Alt útskeringararbeiði gjørdi Hans Jørgensen - Hans í Skúlanum.

Langa fríggjadag 2000 varð nýggja altartalva avdúkað í Miðvágs kirkju. Tað er listamaðurin Torbjørn Olsen, sum hevur málað nýggju altatalvuna, ið avmyndar Jesus á krossinum.

Tað er tað sama evni, sum gamla altartalvan ímyndaði (flyt músina á altarmyndina). Tó var gamla altartalvan - sum er úr gomlu kirkjuni - væl minni og ikki ætla so stórari kirkju.

Á altarinum stendur ein hin viðgitnasti luturin í kirkjuni: stakin sum Beinta skuldi meiða Peder Arrheboe við.

Hóast snotuliga restaurering ber stakin enn merki eftir hendingina. Á makanum sæst einki.

Gudmundur Bruun, sum búði í Jansagerði fyrstu barnaár síni, gav kikjuni doypifuntin. Men stóra dópsfatið av messing, sum var frammanundan, stendur í honum.

[KELDA: J. P. Gregoriussen, Nýggjaru Kirkjurnar]

Kirkjuráðið

Miðvágs kirkja er Vígd 28 september 1952:
Í sýnisskápi í forkirkjuni í kirkjuni stendur modell av trolaranum "Nýggjaberg" VA 82, Lions Club Vágar gav kirkjuni hetta modellið, sum Petur Hans Poulsen í Havn hevur gjørt. Petur Hans er sonur Hans Poulsen, sum var 1, stýrimaður á "Nýggjabergi", tá hann fórst av krígsávum í 1942, Bygningssnikkaravirkið v/Vilhelm M. Johannnesen í Havn gjørdi og gav sýnisskápið. Í Føroya Siglingarsøgu stendur um "Nýggjaberg" at hann var bygdur í 1916 í Beverly hjá Cook, Welton & Gemmet. Hann var merktur til 271,54 bruttu tons og æt tá "St. Hubert". Sambært Bill of Sale dagfest Hull tann 20, februar 1939 keyptu Mortan Mortensen, skipari á Argjum og Sámal Ellefsen, snikkari í Miðvági henda trolara og góvu honum navnið "Nýggjaberg", Tá ið P/F "Múlin" A/S í Miðvági stutt eftir var stovnað, varð trolarin latin til hetta partafelag 20, oktober 1939. "Nýggjaberg" fórst sum nevnt av krígsávum í 1942, skotin niður av týskum kavbáti 7, mars hettar árið, síggja vit í bókaverkinum hjá Niels Juel Arge "Stríðsárini", 21 menn fórust við "Nýggjabergi", av teimum 16 miðvingar.
Hettar var nøkur orð um hettar skipið, nú Føstan er komin verður okkurt annað skip umrøð í narmastu døgum, Eg vóni at lesarnir verða nøgdur og okkurt er her sum lesarnir ikki visti, um hendan "Nýggjaberg" VA 82;;