Føroya Fuglafrøðifelag er farið undir eina verkætlan at kortleggja fuglastovnarnir í Føroyum við skrásetingar appini hjá eBird (www.eBird.org). Verkætlanin strekkur seg yvir trý ár – frá summar 2022 til summar 2025, og vit hava tørv á tykkara hjálp!

Grundarlagið fyri verkætlanini er, at tørvur er á at hava eftirlit við og at kortleggja fuglastovnarnir í Føroyum. Útbreiðslukort kunnu siga okkum, hvar fuglurin livir og nørist, har teljingar og skrásetingar samstundis kunnu gera okkum klókari uppá støddina av fuglastovnunum vit eiga her í Føroyum.

Høvuðsendamálið við hesi verkætlan er tískil, at framleiða útbreiðslukort fyri landfuglin í Føroyum, við møguleika fyri at visa á týdningarmikil fuglaøki. Seinna málið er at kanna, hvussu væl eBird appin egnar seg sum amboð at eggja vanliga borgaran at skráseta og telja fuglar í Føroyum.

Men…!

Ofta liggur stór vitan um fuglalívið í haganum hjá hagaeigarum og festarum, og tí vilja vit sera gjarna hoyra frá tykkum um júst tykkara upplivingar í tykkara haga. Hetta hevði kunna givið okkum eitt enn størri innlit í útbreiðsluna hjá fuglunum í Føroyum. Øll hendan vitanin verður við í tí umfatandi frágreiðingini, ið verður givin út við øllum úrslitum, tá ið verkætlanin er liðug.

Um tit ynskja at deila tykkara vitan við okkum, setið tykkum so endiliga í samband við verkætlanarleiðaran, Dianu Krossá Kongsbak, á teldupost: samskipari@fuglar.fo ella á tlf. 223604 (telefontíðin er týsdagar og mikudagar frá kl. 10-14).

Lesast kann meira um verkætlanina á www.fuglar.fo/ebird , har møguleiki eisini er fyri at skriva seg upp at telja og skráseta fugl.

Diana Krossá Kongsbak

Verkætlanarleiðari