T LEFT

Leita

T RIGHT
Loyvt at veiða Canadagæs?
7. juli 2010
Aðrastaðni er loyvt at veiða Canadagæs í tíðini frá 1. september til 31. januar og hildið verður eisini, at Canadagæsnar kunnu gera óbótaliga stóran skaða á grøðina í februar mánaða og koma gæsnar tá undir villini fuglur, sum kann veiðast. Okkara lóggáva er heilt øðrvísi snikkað til, við tað, at villini fuglur er friðaður.
Fyri fleiri bøndur og onnur við hevur tað stóran týdning fyri landbúnaðin, at so mikið av stráfóður kann fáast, sum yvirhøvur gjørligt. Eitt tað størsta aðalmáli í føroyska landbúnaðinum er, hvussu vit fáa nóg mikið av stráfóður. Gaman í ber til at innflyta nakað til tørvin, men gongda leiðin má vera, at vit megna at dyrka til egið brúk, so fíggjarligur samanhangur eisini kann fáast í raksturin av landbúnaðinum. Fyri fleiri hevur tað tí avgerðandi týdning fyri brúkið, at nóg mikið fæst av stráfóðri við egnari framleiðslu.
Tað er her, at ein hóttan tykist koma frá villini fugli, sum í stórum flokkum koma til Føroya og eftir lítlari løtu kunnu oyða eitt gott dyrkilendi. Myndina av Canadagæsnum er tikin heima á Sandi á Sandafløtum av Terja Dalsgaard (www.sandportal.fo) og vísir okkum bert, hvussu eitt gott dyrkilendi kann verða hótt. Onkur bóndi roynir sjálvur at reka av bønum, men tað er til fánýtis, tí gæsnar flyta seg bara undan so hvørt og seta seg síðani aftur. Tað er eisini umráðandi fyri bøin, at hann fær frið, so grasið fær frið at vaksa og tískil ber ikki til, at fólk við ella uttan hjálpitól ferðast ov nógv á bønum fram til slátturin.
Helst er tíðin komin til at umhugsa aðrar loysnir, sum t.d. at loyva ávísum fólkum t.d. einum bónda ella brúkara, at skjóta Canadagæs í tíðini tá bøurin skal hava frið.


Sniðgivið og forritað hevur KREA
Mjólkavirkið Búnaðarmanna
KREA