Jacob Vestergaard, landsstýrismaður, ið varðar av nógv størsta partinum av landbúnaðinum, upplýsti á fundinum, at ætlanin er, at 1/10 partur árliga skal fara av festikontoini til ein felagsfestikonto. Allir festarar kunnu síðani søkja um pening úr felagsfestikontonini eftir eini ávísari skipan.
Tað verður hildið rætt, at fara so líðandi inn í hesa skipan og serliga ansað eftir, at skipanin kemur at virka nøktandi og festarar eisini fáa stundir til at arbeiða undir nýggju skipanini.
Tað liggur í ætlanini, at festari kann fáa endurgjald fyri inntøkumiss, umframt at kunna fíggja ymiskar royndarætlanir.
Landsstýrismaðurin legði áherðslu á ein framtíðar burðardyggan landbúnað. Við atliti til royndirnar hjá Búnaðarstovuni, so er eyðsæð, at stórur tørvur er á stráfóðri til serliga mjólkineyt. Felagsfestikontoskipanin skal tí verða ein partur av stuðlinum at fara undir at meiri verður velt og herundir at gera brunnar og køstar.
Uppskotið, sum Fiskimálaráðið hevur tilevnað í samrað við Búnaðarstovuna, Búnaðargrunnin og onnur, verður sent til hoyringar hjá viðkomandi pørtum innan landbúnað.

Tá hoyringsfreistin er farin, verða møguligar viðmerkingar tiknar við í tilevning av einum uppskoti til eina felagsfestikontoskipan.
Vónandi koma konstruktivar viðmerkingar til ætlaðu broytingar, so vit fáa eina so góða og vælvirkandi skipan á økinum til frama fyri menning av føroyskum landbúnað.

Eini 120 fólk, sum varða av landbúnaðinum í Føroyum vóru á fundinum í Norðurlandahúsinum (mynd: www.heimabeiti.fo)