Samlaða landbúnaðarframleiðslan liggur um góðar 90. mill. um árið, ið svarar til um 1% av bruttotjóðarúrtøkuni. Í stórum er talan um seyð og mjólk, sum hava størsta týdningin.

Tølini eru frá kanning, sum Búnaðarstovan hevur latið gjørt og sum síggjast í síni heild á heimasíðuni hjá Búnaðarstovuni.

Framleiðslan av seyði fer í stóran mun fram sum einstaklingaframleiðsla, har einstaklingar eiga nakað av jørð og hava seyð gangandi - antin á trøðum ella í haga.

Festibøndirnir standa møguliga fyri upp móti eini helvt av seyðahaldinum. Metingar út frá áseyðatalinum og frá innkomnum skinnum, tá flettingin er fyri, gav ábendingar um, at umleið 70.000 seyðir verða flettir árliga. Hetta svarar til eina árliga kjøtframleiðslu á umleið 950 tons. Hetta tal hevur ikki broytt seg stórliga seinastu mongu árini, verður staðfest í kanningini hjá Búnaðarstovuni, sum eisini hevur bóndafelagið sum heimildarkeldu.